आज्या बेटे तन्ने जीवन का एक नया पाठ पढ़ा दूँ।
नये तरीके त तन्ने क ख ग घ मैं आज सिखा दूँ।।
क त क्लेश जिंदगी में बेटा कदे बी किसे त क्लेश करिये ना।
ख त खराब बनते काम नै खराब करण में नीत धरिये ना।
ग त गर्व जिंदगी में अपने आप गर्व करके घना फुलिये ना।
घ त घमंड कितना ऐ बड़ा होज्या घमंड में टुटा फैरिये ना।
आज्या बेटा तन्ने अमृत ज्ञान की घूँट भरा दूँ।।
च त चिंता छोड़ बेटा चिंतन कर समस्या का हल टोह ले।
छ त छल कपट छोड़ दे छल कपट इज्जत का कर खोह दे।
ज त जवाबदारी अपनी निभा कै बेटा सबका मन मोह ले।
झ त झूठ बोलिए ना बेटा झूठे मानस नै हर कोय छोह दे।
जीवन किस तरियाँ जीना चाहिए तन्ने समझा दूँ।।
ट त टिप्पणी बेटा किसे मानस प टिका टिप्पणी करण त बचिये।
ठ त ठग बेटा जीवन में किसी गेल्लां ठगी करके ना ठग बनिये।
ड त डरपोक बेटा जीवन में डरपोक बन के ना किसे त दबिये।
ढ़ त ढोंग बेटा जीवन में कितनी ऐ मुसीबत आज्याँ ना ढोंग करिये।
एक एक बात बेटा आज तन्ने खोल के बता दूँ।।
